Дорйисны Айму

Таво ми кыпыда пасйим Вермӧмсянь 65 во. Таво жö мартын тырис 70 во, кыдзи помасис «тöвся» тыш, сідз шусяна советско-финскӧй кампания. Тайӧ тыш йывсьыс миян зэв этша гижöны, шоча казьтылӧны, кӧть страна воштіс 131.476 мортӧс. Кыкӧн усисны и Немдінысь: тайö Николай Иванович Карманов да Алексей Фёдорович Тимушев.

Николай Иванович Карманов чужис 1912 воын Немдінса Вичкодорын Кармановъяслӧн ыджыд семьяын. Батьыс — Иван Антонович, мамыс — Аксинья Ивановна Габова. Николай нёльӧд кага, Андрей чужис 1906 воын, Алексей 1908-ын, Ульяния (ӧтка ныв) — 1910 воын. Пётр да Фёдор чужисны Октябрса революция бӧрын. Ӧтиыс — 1922, мӧдыс — 1924 воын.

Бать-мамыс олісны видз-му овмӧс помысь, а тӧвнас мужичӧйяс ветлісны нажӧвитчыны Урал дорса заводъясӧ, сійӧн налысь рӧдсӧ шулісны «зимӧгоръясӧн». Олісны бура, став челядь велӧдчисны, а Пётр да Фёдор войнаӧдз удитісны помавны Кулӧмдінса шӧр школа. Немдінын вӧлі 7 класса, шӧрыс лоис сӧмын 1943 воын.

7 класс помалӧм бӧрын Николай Иванович Карманов пырис велӧдчыны Ульянаса видз-му овмӧс техникумӧ, кӧсйис лоны зоотехникӧн. Велӧдчигас тӧдмасис Раиса Андреевна Худяевакӧд, коді бӧрынджык лоис сылӧн гӧтырӧн.

Техникум помалӧм бӧрас Николай Кармановӧс босьтӧны Гöрд Армияӧ. Служитіс Старöй Русса карын. Локтӧм бӧрас кутіс уджавны Паль сиктын зоотехникӧн, сэсся сійӧс корисны Сыктывкарса видз-му овмӧс техникумӧ велӧдысьӧн. Гӧтырыскӧд олісны Выльгорт сиктын, быдтісны Анатолий пиӧс.

Но семьялӧн шудыс вӧлӧма дженьыд. Заводитчис финнъяскӧд тыш. Николай Иванович вӧлі резервын. И 1939 вося декабрь 4 лунӧ сійӧс босьтісны армияӧ. Николай Иванович век кежлӧ муніс гортсьыс дорйыны Чужан мусӧ. Н.И. Карманов служитіс 533 мотострелкöвöй полкын, коді пырис 128 номера мотострелкöвöй дивизияӧ. 1940 вося март 4 лунӧ пӧгибнитіс тышын, шог юӧр воис ылі мусянь муса гӧтыр да дона пиыслы, бать-мамыслы, чой-вокыслы.

Николай Ивановичӧс ёртъясыскöд дзебисны öти гуö Катаярви (Каляярви) сикт дорын, ӧні сійӧ пырӧ Финляндияö. Николай Ивановичлы вӧлі сӧмын 28 арӧс, кор снайперлӧн пуля орӧдіс том мортлысь олӧмсӧ.

Кор заводитчис Великöй Отечественнöй война, Кармановъяслӧн семьяысь медыджыд пиыс служитіс нин армияын. Андрей Ивановичӧс босьтісны 1940 воын, пыр жӧ нуисны Казахстанӧ, служитіс НКВД-лӧн войскаын, видзис политзаключённӧйяслысь лагерь. Гижліс некымын рапорт, мед босьтасны Ыджыд тышӧ, но век ӧткажитлісны. Сэні (Казахстанын) служитіс 1947 воӧдз, гортас бӧр эз лок, кольччис овны Алма-Атаӧ, кӧні кувсис 1978 вося октябрын.

1941 вося июльын фронт вылö нуисны и Пётрӧс. Кыдзи велӧдчӧм мортӧс, сійӧс мӧдӧдісны Великӧй Устюгӧ Пуховичса военнöй пехотнöй училищеӧ, кодӧс помалӧм бӧрын сетӧны младшӧй лейтенант чин. Лоис стрелкöвöй взводса командирӧн, служитіс Калининскöй фронт вылын 372 стрелкöвöй полкын. Пӧгибнитіс 1942 вося апрель 16 лунӧ. Сылы вӧлі сӧмын на 20 арӧс. Эз удитлы гöтрасьны, лӧсьӧдны ныв-пиӧс, орис том олӧмыс Айму дорйигӧн.

Сійӧ кадӧ тышкасис вӧрӧгкöд и ӧтка ныв Ульяния Ивановна Мамонтовалӧн (Кармановалӧн) верӧсыс — Африкан Ильич. Налӧн вӧлі быдмӧны нин кык пи: Егор да Василий. Африкан Ильич чужис 1910 воын ыджыд семьяын Немдінса Кӧджмӧдарын. Война вылö сійӧс колльӧдісны 1941 вося август 28 лунӧ. Служитіс 827 стрелкöвöй полкын радӧвӧйӧн. Пӧгибнитіс Калмыкияын медся сьӧкыд тышъясын 1942 вося сентябрь 29 лунӧ. Нӧшта ӧти шог юӧр воис Немдін сиктӧ, Кармановъяслӧн керкаӧ. Ульяния Ивановна коли дӧваӧн 32 арӧссянь, ӧтнасӧн быдтіс кык пиӧс да нылӧс.

Воис öчередь тыш вылö мунны и медся дзоля, медся муса пиыслы, Фёдорлы, коді вӧлі бать-мамлӧн надеяӧн да шудӧн. Фёдор Иванович чужис 1924 воын, муртса удитіс помавны Кулӧмдінса шӧр школа, кӧсйӧ вӧлі водзӧ велӧдчыны, но ставсӧ торкис война.

Сӧмын тырис сылы 18 арӧс, 1942 вося август 10 лунӧ босьтісны армияӧ. Кыдзи велӧдчӧм мортӧс, сійӧс, Пётрӧс моз жӧ, мӧдӧдісны Великӧй Устюгӧ Пуховичса военнöй пехотнöй училищеö. Фронтлы вöлi колöны командиръяс, и налысь велӧдчан кадсö чинтiсны. Сержант чинöн Фёдор заводитiс служитны 49-öд дивизияса 222 стрелкöвöй полкын.

Регыд мысти чорыд тышын Фёдор Иванович Карманов пӧгибнитіс. Тайӧ вӧлі 1943 вося март 10 лунӧ, коли сӧмын 7 тӧлысь сылӧн тыш вылӧ мунӧмсянь, а гортас, Немдінӧ, бать-мамыслы воис нӧшта ӧти шог юӧр. Фёдорлы вӧлі 19 арӧс.

Пётрӧс дзебӧма Новгород обласьтса Глушицы деревняын, коді Чудовской районын, а Фёдорӧс — Калуга обласьтса Жиздринскӧй районын Ослинка грезд дорын. Но бать-мамыс эз вермыны ветлыны налӧн гуяс вылӧ.

Алексей Иванович Карманов оліс Маджа сиктын, служитіс милицияын. Сылӧн вӧлі ыджыд семья, гӧтырыскӧд чужтісны-быдтісны 8 ныв-пиӧс. Милицияын служитысьясӧс фронт вылӧ эз босьтны, кӧть и Алексей Иванович некымынысь гижліс рапорт, мед мунны дорйыны Рöдина. Сійӧ коліс тылын, аслас удж вылын. Сылӧн вӧлі зэв ыджыд участок: Пезмӧг, Маджа, Озёл, Сёйты. Вӧлі старшина чина, пенсияӧдзыс уджаліс милицияын. Кувсис Маджаын 1976 вося декабрын.

Карманов гозъя, Иван Антонович да Аксинья Ивановна, воштісны войнаяс вылын куим пиӧс да зятьӧс. Недыр мысти, 1944 воын, и ачыс кӧзяиныс кувсис. Гозъя зіля уджалісны колхозын, став дзоньвидзалунсӧ, вынсӧ сетісны ӧтувъя овмӧслы. Иван Антонович ӧтнас кыскӧма сьӧкыд пу пыж Эжва вывсянь берегӧ, вӧрзьӧдӧма гырк пытшкӧссӧ, и кык лун мучитчӧм бӧрын кувсьӧма. Гӧтырыс сійӧ кадас абу вӧлӧма гортас, лэччылӧма видлыны Алексей писӧ да сылысь семьясӧ, кодъяс олісны Маджаын, да Рая моньсӧ, коді пиыскӧд оліс Выльгортын.

Аксинья Ивановна колис ӧтнас, ёна шогсьӧм вӧсна сійӧ пыр омӧльтчис и омӧльтчис, воштіс дзоньвидзалунсӧ. Оліс Андрей пиыслӧн гӧтырыскӧд да Вера нима внучкаыскӧд. (Андрей кольччис овны Алма-Атаӧ, мӧдысь гӧтрасис, челядьыс мӧд гӧтырыскӧд эз вӧвны). Кувсис Аксинья Ивановна 1956 воын.

Уна шог да дой вайис миян йӧзлы медся сьӧкыд, медся вир кисьтана тышыс, но салдатъяс сетісны ассьыныс олӧмсӧ эз весьшӧрӧ, найӧ дорйисны Аймунысö, мед водзö олiсны бать-мамыс, гöтыръясыс, челядьыс. Ми век кутам казьтывлыны усьöмаясöс, некор ог вунöдöй, найö век миянкöд.

А.В. Липина,

Немдiнса библиотекаын уджалысь.

Коми му, 2010, Август 14 лун.